Uburyo bwo kwemeza uruhurirane rw’ibintu byinshi (MFA) mbere yo kwinjira muri konti, ni urwego rw’umutekano rw’inyongera rukoresha ibice byinshi by’amakuru ufite kugirango hemezwe umwirondoro wawe.

MFA (Multi-Factor Authentication) isaba nibura ibice bibiri (2) by’umwirondoro kugirango yemeze umukoresha (user).

Abantu bagirwa inama yo gukoresha MFA nk’uburyo bwiza bwo gukoreshwa igihe winjira muri konti yawe kuko bukomatanya uruhurirane rw’ibintu mu kugenzura umwirondoro n’umutekano mbere yo kwinjira muri konti yawe cyangwa mu zindi serivisi.

Ubu buryo bukomatanya umwirondoro w’inyongera ku mazina n’ijambo banga wakoreshaga winjira muri konti yawe. Bikagufasha kwinjira byizewe muri konti yawe, kuko bigusaba kongeraho ikintu cy’inyongera nko kwemeza ukoresheje telefoni yawe, bikaguha no kugenzura neza ukanamenya igihe cyose konti yawe ishatse kwinjirirwa.

Ibiranga MFA birimo:

1. Ikintu umukoresha azi (urugero: ijambo ry’ ibanga, PIN)

2. Ikintu umukoresha afite (urugero: ikarita, PIN ikoreshwa inshuro imwe)

3. Umwihariko uranga umukoresha (urugero: igikumwe, kumenyekana mu maso).

Mu ngingo zacu zabanje aho twavugaga kugukoresha uburyo bwizewe winjira muri konti yawe, twavuze bihagije impamvu MFA ikwiriye kwitabwaho n’abakoresha ikoranabuhanga.

Ubu noneho tugiye kubagezaho inama zinyuranye ukoresha ikoranabuhanga yakwishyiriraho uburyo bwo kwemeza ibintu bikomatanyije mbere yo kwinjira muri sisitemu cyangwa konti ye.

Uko bikorwa:

1. Kwiyandikisha:  Guhuza igikoresho cy’ikoranabuhanga (nka telefoni) na sisitemu ugiye gukoresha, kugirango wemeze neza ko icyo gikoresho ari wowe nyirubwite ugikoresha.

2. Kwinjira: Iyo winjira, winjiza izina ukoresha, n’ijambo ry’ibanga nkuko bisanzwe iyo winjira muri sisitemu itekanye.

3. Igenzura: Sisitemu ihuza amakuru yose yakiriye kugirango igenzure koko ko ahura. Nka telefoni ishobora kugusaba gukanda cyangwa kwemeza kode igenzura koko ko ari wowe.

4. Umusozo: Igikorwa cy’igenzura nicyo gisoza. Kwinjiza kode cyangwa gukanda akamenyetso kemeza ukoresheje telefoni, ni imwe mu ngero z’uburyo bukomatanije bukoreshwa mbere yo kwinjira muri sisitemu cyangwa Konti yawe.

Google

Gushyiraho uburyo bukomatanije bwo kwinjira muri konti ukoresheje Google ukurikira  https://www.google.com/landing/2step/ ubundi ugakanda ahanditse gutangira (Get started).

Huza telefoni yawe na konti yawe, ubundi urebe ahagenewe ishakisha rya Google (Google Search) winjire. Ushobora no kujya muri telefoni ugakanda aho ubisabwe, bityo ukemeza neza ko ari wowe.

Iyo umaze gushyiramo neza uburyo bwo kwinjira muri konti busaba kugenzura kabiri, urongera ukinjira muri konti yawe unyuze kuri “Security Settings”. Aho usabwa numero zose za telefoni zishobora kwakira kode igenzura, hitamo gukoresha igenzura rya porogaramu (app) wakire kode 10 zitarakoreshwa. Izi ushobora no kuzibika ku rupapuro zikazakugoboka nk’igihe telefoni yawe yaba yapfuye cyangwa aho utabasha gukoresha igenzura na porogaramu (app) kandi ukeneye kwinjira muri konti yawe.

Microsoft

Injira muri konti yawe  account.microsoft.com/profile.  Winjiye ku rubuga rwa Microsoft, kanda ahanditse “Security”, munsi y’aho bahindurira ijambo ry’ibanga, kanda ahanditse “More Security”. Ahanditse uburyo bukomatanije bwo kugenzura (Two-step verification), Hitamo gukanda ahanditse “Set up two-step verification”.

Injiza umwirondoro wawe ahabugenewe. Microsoft ifite uburyo bwihariye yakoze porogaramu y’igenzura (iOS, Android) ikwisabira kuyishyiramo. Sikaninga (Scan) Kode ya QR ubone kwemeza uburyo bw’igenzura bukomatanije.

Apple ID

iPhone, iPad or iPod touch

Jya ahakorerwa igenamiterere, wandike izina ryawe, ushyiremo ijambo ry’ibanga (Settings > [izina ryawe] > Password & Security), ubundi ujye ahanditse uburyo bwo kugenzura bukomatanije (Turn On Two-Factor Authentication). Kanda ahanditse gukomeza “Continue” ubone kwinjizamo numero yawe ya telefoni wifuza kujya wakiriraho kode ikwemerera kwinjira muri konti. Ushobora guhitamo kwakira code kuri message (SMS) cyangwa uburyo bwo guhamagarwa bwikora (automated phone call). Mbere yo kwinjiza kode wakiriye banza ushyireho uburyo bukwemerera kugenzura muri telefoni yawe (turn on two-factor authentication).

Mac

Hitamo ahanditse  Apple menu > System Preferences, ubundi ukande Apple ID > Password & Security. Ujye ahanditse uburyo bwo kugenzura bukomatanije (Two-Factor Authentication), ubundi wemeze.

Facebook

Kuri mudasobwa yawe ahagana hasi, hitamo ahanditse ijyenamiterere (Settings & Privacy), ubundi wemeze kwinjira. Kanda guhindura (edit), ahanditse uburyo bwo kwinjira bukomatanije. Ukiri aho, hitamo uburyo wifuza kujya wakira uburyo bwo kwinjira bukomatanije byaba kuri mesaji yanditse, uburyo bukoresha porogaramu cyangwa urufunguzo wahabwa (physical key).

Niba uhisemo porogaramu, Urubuga rwa Facebook ruraguha kode ya QR ukoresha kuri mudasobwa yawe. Fungura porogaramu yo kwemeza kwinjira (authenticator app) muri telefoni yawe, uhitemo ahanditse gushyira (add), werekeze telefoni yawe kuri mudasobwa yawe kugirango iyo kode ijyemo. Ubutaha niwinjira muri iyo porogaramu, Facebook izagusaba kode y’imibare 6, uzafungura porogaramu yawe kugirango uhabwe iyo mibare.

Twitter

Kugirango ushyiremo uburyo bukomatanije bwo kugenzura kwinjira muri Twitter kuri mudasobwa, kanda ahari igenamimerere (Settings & Privacy > Account > Security > Two-Factor Authentication). Ushobora guhitamo kubona kode ukoresheje ubutumwa bwo muri telephone, porogaramu yabugenewe, cyangwa urufunguzo uhabwa rukoreshwa kuri mudasobwa.

Uburyo nk’ubu buvuzwe haruguru nibwo bukoreshwa muri apulikasiyo ya Twitter, gusa mu gutangira bagusaba kubanza gukanda ku ifoto iri ku mwirondoro wawe kugira ngo ugere ahari igenamimerere ya konti yawe.

WhatsApp

Jya ahari igenamiterere (Settings > Account > Two-step Verification). Kanda ahanditse gushyiramo “Enable”, Whatsapp iragusaba gukora PIN y’imibare 6 kugirango wandikishe telefoni yawe kuri WhatsApp. Iyo uramutse usohotse muri watsapu ukongera kwinjira ukoresheje indi telefoni, WhatsApp igusaba kwandika kode iguhaye, ndetse ukongera ukanandika ya PIN yawe y’imibare 6. Ushobora kujya muri porogaramu ya WhatsApp ugahindura PIN yawe cyangwa se emeli ukoresha.